گفت و گوی شریعتی با فیاض در قالب دوبیتی
شریعتی:
مسیج تو نمیه چیز کار کنوم مه
دلمه موشه که از تو قار کنوم مه
پنج دقیقه اگه مسیج تو نیه
میسکال کیده توره بیزار کنوم مه
فیاض:
دیست مه بنده مسیج رایی نموشه
رنگ شِیرغه از مو، کایی نموشه
مسیج پورتو کیدوه، کار ایلیه
ده داغ دل مو دوایی نموشه
شریعتی:
مه قربان امزو میسکال کیدی تو
مه قربان جاغه ی کشیده تو
قاش تو ایستور، کمر تو رستم زال
مه قربان دلِ هردم میده تو
فیاض:
ده ای روزا کلو سؤال موکونی
میسکال کده مره آلال موکونی
اگه دل تو توره گوفتویه الی
بچی ده جیب از مه اوال موکونی!
(سلمانعلی زکی:
جیب خالی کجا میسکال می تنه
از خوبییای گل سوال می تنه
قرض و قوله کده، خبر می گیره
کجا چیمای خوره آلال می تنه؟)
شریعتی:
مونی میسکال، الی آتیم خبر شد
امو نامزاد بیجرگیم خبر شد
واده بدی یک روز باییم خانه تو
تا چیم خو واز کنی واده سفر شد!
فیاض:
مره کوشته اسِ میسهای تو الی
قاشک زدو و ایشارای تو الی
نخره کیده که ده گوشی مه میی
بالک بالک میزنوم ده رای تو الی!
شریعتی:
مه قربان ازی مسیج کیده تو
مه قربان نرمک میسکال کیده تو
یگو وختا که در مه زنگ می زنی
مه قربان سوله گگ خندیده تو
ده سر مه کم ـ بیگا ـ دماغ کو الی
جای یک ماخ بیه ده ماخ کو الی
اگه قار تو از یک ماخ کم نموشه
ای کومه ره از ماخ، سولاخ کو الی