دزی ملگاه پریشانوم خداجان
مه قربان همو قاشو قباغ تو
مه قربان بلند ایرمه دماغ تو
اگورایی ایلمگ چیلمگ موکونی
مه قربان اشارای قباغ تو
***
موهای تو غمبه غمبه توبه توه
بلی سینه سفید تو چپه خوه
بخشی مویای تا کمر توآلی
روز روشن مه مثل موی تو شوه
***
کشکی موتر غورغوری موبودوم
یگ لاظه باد ده جاغوری موبودوم
پیته صفدر ره گوش کده مورفتوم
پیش دیده ده انگوری موبودوم
***
دزی ملگاه پریشانوم خداجان
شبیه خط پایانوم خداجان
شو مه تاریکه مثل شاو مردا
فصلای مه کل زمستانه خداجان
***
بخشه از مه فصل بارانه دیده
فصل طوفان فصل عصیانه دیده
اگر یگ لاظه ده پیش مه نباشه
امی دنیا بخشیم زندانه دیده
***
کوله خلقی واری ده سر شی بودی
ده ای روزا کشکی ده بر شی بودی
زمستویه اوور باریشه تیران
الیگونو کشکی چادر شی بودی
***
ده جانشی پیرن گلدار می شینه
امزو رختهای گلنگار می شینه
کشکی خانه مه ده کوبند نبودی
دل مه ده دل شی ارغید بند نبودی
کشکی خدا موکد مه شوی شی بودوم
قد دستنگی ارغید پالوی شی بودوم
الی که بیخ مه کنده دست مه تنگه
ده پا لوی شی بچه مزار می شینه!
***
بیه که لب خو ده بل لب تو بیلوم
دست خو ده دست با ادب تو بیلوم
دست خو ده دست با ادب چه باشه
دل خو بل دل لا مذهب تو بیلوم