سرکوه بلند...

ده اي روزا زكي بي مايه لالي

اينجا،اونجا،هرجا بيجايه لالي

سركوه بلند ده انتظار شي

بوگي روي مو سون فردايه لالي!

***

سپيدي صبح گايه ماه روي شي

شام تاريك وريه غنچه موي شي

تمام روز قدمه ده جنگي الي

نموفاموم ديده از خوي و بوي شي!

***

درد ناسور شده ده جان مه الي

مثل بيد مي ليرزه ايمان مه آلي

سرچوشلي دعواركه پيش موكونه

آتش ميزنه ده خان مان مه الي!

***

دل مه ميده شده ازيار مه الي

امي دنيا نيه ده كار مه الي

از بس كه زندگي ده سرمه سخته

شام غربته شاو تار مه الي!

***

سيا سپيد موشه روزاي مه الي

ده گوش شي نموره صداي مه الي

تاويز دعاي دلگرمي گروفتوم

ملا هم نديره هواي مه آلي!

***

ايت كس نيه ده گردوبر مه آلي

اوور باريشه چيم تر مه آلي

ديگه چاره ندروم چاره مه چاره

فقط مانده راي سفر مه الي!